Wëllefcher

Mat Kanner aus dem Wëllefsalter d’Liewen entdecken heescht Freed um Neien, Kreativitéit a Fantasie an de Kanner waakreg maachen an entwéckelen. Kanner am Alter vun 8 bis 11 Joer sinn immens virwëtzeg, wëlle gäre bäiléieren, experimentéieren a fuerschen. Am Wëllefchersalter setzen d’Kanner sech staark mat hirer Ëmwelt auserneen. Si fänken un Interessi fir bestëmmten Hobbyen ze weisen, si leeschtungsfäeg an hunn Ausdauer.

D’Kand huet an deem Alter d’Bedierfnes sech d’Welt erklären ze kënnen – et freet vill no, Hannergrënn vun de Saache ginn interessant. De Wëllefche versicht ëmmer méi Zesummenhäng ze entdecken an ze verstoen. Sou lues bilt sech beim Kand e méi realistescht Weltbild aus, et kann sech an deem Alter och besser konzentréieren a léisst sech gären op Neies an.

An dësem Alter kënnen a wëllen d’Kanner a ville Beräicher Verantwortung iwwerhuelen. Si gi lues a lues méi selbstänneg. D’Bezéiung zu Gläichaltrege spillt eng ëmmer méi grouss Roll. De Wëllefche wëllt lo sou lues seng eegen Entscheedunge kënnen treffen. Well mir Wëllefcherchef dat verstanen hunn, probéiere mir d’Kanner bei dësen dach usprochsvollen Aktivitéiten  ze fuerderen an ënnerstëtzen. Dat ass eis Aufgab als Chef.